බල්ලට ගියපු සෙනසුරාදා ව හෙවත් ශැඩෝ දවස්

 බල්ලට ගියපු සෙනසුරාදාව....

============

මට දැන් මේ කෝලම් කරන්න කෙනෙක් නෑ. සෙනසුරාදා තමයි උගෙ දවස. ඒ වගේම හොඳට ඉර පායල , සැරට අවුව වැටෙන සෙනසුරාදාවක් කියන්නෙ ඒක නම් බල්ලටම ගියපු ශැඩෝ දවසක්...

බාතෲම් එකේ ලොකු බේසම පිරෙන්න ටැප් එක ඇරල. පොඩි බාස්කට් එකට ශැම්පු දානකොටම එයා දන්නව ඒ නම් එයාව නාවන්න තමයි කියල. 

නාන්න හරිම කැමති නිසා ඌට හෙන හැපි.හැබැයි මට එක සැරේම එයාව අල්ලගන්න බැරි වෙන්න වට දෙක තුනක් දුවනව, මාව පස්සෙන් ගෙන්න ගන්න. මන් අම්මෝ බෑ ශැඩෝ.. එක්කො අද  නාන්න ඕනෙ නෑ එහෙනම් කියල උගෙ පස්සෙන් පන්නන වැඩේ නතර කරාම ඔන්න ඉතින් නටෝ නටෝ ළඟට එනෝ. 

ලෝම පිරුණ වලහෙක් වගේ ඒ සයිස් ජර්මන් ශෙපර්ඩ් බල්ලෙක්ව  නාවනව කියන්නෙ ඉතින් මාත් නාන්න ඕන අනිවා . බල්ලෙක් නාවනේක හරිම ඉවසීමෙන් කරන්න ඕන වැඩක්. පොරගෙ ලෝම කෝට් එක තෙත කරගන්නම සෑහෙන වෙහෙසක් දරන්න වෙන්නෙ , දාන දාන හැම වතුරෙකටම පස්සේ ඇඟම සලිත් කරල ලෝම ගසල මුළු පළාතම වතුර බිංදු වලින් සංතෘප්ත වෙන්න විසුරවන නිසා. ශැම්පු දැම්මාම තව ශෝක් ඉතින් ඒකනේ " Anybody who doesn’t know what soap tastes like, never washed a dog." කියල සුද්දත් කියල තියෙන්නෙ.

පොර නාවල ශැම්පු ගාන වැඩේට හෙනම කැමති. බෙල්ල යට ශැම්පු පෙන පිරිලා තියෙද්දි බෙල්ල උස්සන් ඉන්නවා තව කසපන් කියල.නාවල ඉවරෙල පිහිනෙක තමා ආතල්ම වැඩේ. මුලදි පිහින්න දෙන්නෑ. ලොකු ටවල් එකේ එක පැත්තක් ඌ අදිනවා අනිත් කොන " මෙහෙ දියන් බන් " කියල මම අදිනවා. ඒ  වැඩෙත් " එහෙනම් උඹම පිහගනින් " කියල අතෑරියම තමා ඌත් එහෙනම් උඹ පිහපන් අක්කෙ කියල ඉඩ දෙන්නෙ. මන් එයාව පිහින්න පාවිච්චි කරපු , ශැඩෝගේ දත් වලට තැන තැන හිල් හැදුන එයාගෙ අන්තිම තුවායත් එයා එක්කම වල දැම්මා.

හොඳටම තෙත පිහින්නෙ නැත්තෙ ඊළඟ වටේ තියෙන්නෙ අවුවෙ ඇවිදින්න නිසා

මන් හිතන්නෙ අවුවෙ ඇවිදින්න එක්කරන් යන නිසා තමා ශැඩෝ නාන්න කැමති. හති වැටෙනකම් අවුවෙ ඇවිදල ආවට පස්සෙ එයාට හම්බෙන රස කෑම පුරවපු එයාගෙ පිඟානත් හේතුවක් වෙන්න පුලුවන්.

උගෙ ලෝම කපනෙක නම් මන් හෙන ලෝබකමින් කල වැඩක්. තෙත හොඳටම වියලුනාම එයාව පීරන්නත් මන් අලුත් පනා ගොඩක් ගෙනත් අන්තිමට ගෙනාපු පනාව තාම අලුත් පිට තියනවා.ශැඩෝගෙ ඉස්සරහ කකුලක් මම අත දුන්නම අතට අත දෙනව වගේ දුන්නට පස්සෙ නියපොතු කපල ඇඟිලි අතරෙ කිනිතුල්ලො ඉන්නවද බලනෙකට එයා හරිම කැමති. 

එකාතකට ඉතින් තමන් ගැන තව කෙනෙක් ආදරෙයි නම් හොයල බලනව නම් සතෙක් නෙමේ මනුස්සයෙක් උනත් කොච්චර නම් කැමතිද...

Caring for others is the highest expression of humanity.” කියන්නෙ නිකම්‍ යැ.

දැන් ඉතින් මට එහෙම බලාගන්න බවුවෙක් නෑ. හැබැයි කොල්ලෙක් හිටියනම් ඔයිට වඩා හොඳට බලා නොගෙන ඉන්නෙත් නෑ....

පොඩ්ඩක් කල්පනා කරල බලන්න....